Солзите на Јустинијан

Во една ноќна чајџилница во Старата чаршија, сопственикот е пронајден мртов. Под неговиот очен капак некој внимателно ставил мала оловна солза. Наскоро следува второ тело на Кале, а потоа и трето, кај Старата железничка станица, каде часовникот засекогаш стои на 5:17.

Инспекторот Игор Ангелов гледа нешто што неговиот шеф одбива да го види: убиствата цртаат форма врз мапата на Скопје. Трагата го води низ архиви со документи што „не постојат“ и низ заборавени тунели под Вардар. На крајот стига до еден закон изгласан „во време на летни одмори“. На маргините на тој закон стои запис од два збора: „Јустинијанов принцип“.

„Солзите на Јустинијан“ е скопски ноар во кој градот не е само место на настаните, туку лик со своја меморија и свои тајни. Ќе ја сакаат читателите што уживаат во загатки, симболи и трилери во стилот на Ден Браун, но и сите што сакаат да го видат Скопје поинаку.

Книгата е дел од скопскиот ноар-универзум заедно со „Заѕидана во Барокот“ и „Олово во коските“. Трите романи се читаат и самостојно, но заедно откриваат врски меѓу ликовите и градот.

Авторот, д-р Филип Петровски, поранешен директор на Државниот архив и на градската библиотека „Браќа Миладиновци“, во книгата ги внесува ходниците на архивите и подземјето на Скопје што ги познава одблиску.